Azərbaycan Konstitusiyası de-fakto qüvvədə deyil

2020-ci ilin bu günlərinə kimi dövlət suverenleyimiz sözdə (“de-yure”) idi, “de-fakto” 20 faizimiz işğalda idi. Konstitusiyaya gəldikdə isə sözdə qüvvədədi(r), faktiki olaraq heç bir qüvvəsi yoxdu(r).  2025-ci ilin SUVERENLİK və KONSTİTUSİYA ili elan edilməsi də heç nəyi dəyişmədi, Konstitusiya hüquqi yöndən dövlətin ən ali qüvvəli qanunu olsa da, faktiki olaraq nəinki ən ali , heç qüvvəsinin olmadığı hələ də sürür. Özü də məhkəmə aktları ilə! Özü də məhkəmənin ali səviyyəsində! HAKİM-QAZILARIN RÜŞVƏTİ DÖVLƏTDƏN , KONSTİTUSİYADAN UCADA TUTMASI SAYƏSİNDƏ! SUVERENLİK isə 5 ildir həm hüquqi, həm də faktiki qüvvəsini alıb. ŞƏHİDLƏRİN, MƏHKUM QAZİLƏRİN DÖVLƏTİN SUVERENLİYİNİ VƏ KONSTİTUSİYA QURULUŞUNU QANLARI İLƏ  QORUMASI SAYƏSİNDƏ!

Bizi radikallıqda suçlayanları faktlarla üz-üzə qoymağa çağırırıq. Alman filosofu Fridrix Nitsşenin sözüdür, deyib ki, faktlar qəddar olur. Cinayət işlərindəki qəddar faktları anıdaq. Qazi Tofiq Yaqublu (oğlu Rəhim bəy də qazidir) , Qazi Rza Səfərsoy (ömür-gün yoldaşı Təranə xanım da qazidir), Qazi Ruslan İzzətli,...(siyahı uzundur) nə böyük suçun yiyəsidirlər ki, sifarişli qazı ədavəti ilə qəddar hökmlərlə “təltif olunublar”? Qazilər Azərbaycan Bayrağı, suverenliyi, Konstitusiyası uğrunda ona görə vuruşub ki, ucaltdığı BAYRAĞIN kölgəsindəki qazamatda faktsız, sübutsuz cəza çəksin?

Mülki və inzibati işlərə gəldikdə, Konstitusiyanın ümumiyyətlə qüvvədə olmadığı aktlaşdırılır. Konstitusiyanın qüvvəsizliyinə baxın, dövlətin adından çıxarılan məhkəmə qərarlarını borclu dövlət orqanı kefi istəyəndə “ləğv edir”, kefi istəyəndə “qüvvəyə mindirir”, kefi istəyəndə tamam sistemdən sildirir. Bu sətirlərin yazarının tələbkar statusunda olduğu 10 (!) məhkəmə qərarının 9-u sistemdən silinib, qalan biri isə 15 ildir yaddan çıxıb. (Yada düşsə idi, onu da sistemdən silərdilər). 15-20 ilin “köhnə palan içini sökməyək”, lap qəttəzə fakta üz tutaq.

1 BİİM-in 05.07.2017-ci il tarixli Qərarı ilə tələbkar 1-ci dərəcəli Qarabağ qazisinin pensiyasına əlavə olunan 110 manatı 2023-cü ilin aprelindən borclu ƏƏSMN tabeliyində DSMF-in Xüsusi Şərtlərlə Təyinat üzrə Mərkəzi Filialı (XŞTMF) kəsib, 31 aydır bərpa etmir. 31 aydır qanunverici Milli Məclis “biz nə edə bilərik” deyir, icraedici PA, NK, prokurorluq, ƏN-in icra şöbələri, “aidiyyətsizlikdən” “susur”, Ombudsman MHŞ qərarı çıxaran Bakı İnzibati Məhkəməsini (BİM) nişan verir, məhkəmə (Günel Sevdimalıyeva, Aygün Abdullayeva, Aygün Əhədova,...) isə dövlətin adından çıxarılan məhkəmə qərarının icrasını MÜMKÜN SAYMIR. (?) Bu mümkünsüzlüyü Bakı Apellyasiya Məhkəməsi (Şərafət Məmmədova, Pərviz Hüseynov, Ceyhun Məmmədov; Elvin Əliyev, Aytən Oruczadə, Cahangir Yusifov, Günel Abbasova;...) qüvvədə saxlayır, Ali Məhkəmə isə kassasiyanı mümkün saymır. Belə mümkünsüzlüklə Konstitusiya mümkün , qüvvədə ola bilər? Təbii ki, ritorik sualdır. Konstitusiyanın 129-cu maddəsinə görə, məhkəmənin qəbul etdiyi qərarlar dövlətin adından çıxarılır və icrası məcburidir. Məhkəmə qərarlarının icra olunmaması qanunla müəyyən olunmuş məsuliyyətə səbəb olur. Bu Konstitusiya, bu da məhkəmələrin borclunun rüşvəti ilə görməzliyi. (rüşvətdən özgə hakim qazıları korluğa nə qoya bilər?). Məhkəmə qərarını icra etməyən borclular, icraya yönəltməyən məhkəmə qazıları məsuliyyətə cəlb olunmaq yerinə, tələbkar 1-ci dərəcəli qazi cəzalandırılır, daşınar əmlakından- pensiyasından məhrum edilir.(??)

1BİİM-in 20.06.2016-cı il tarixli, 2-1(81)-1095/16 saylı Qərarının (h. Şərafət Məmmədova, 7 ildir rüşvət hakimliyini Bakı AM-də sürdürür) “bəxti” isə 10-cu ildir açılmır ki açılmır. “Bəxtsizliyə” baxın, tələbkarın icranı tələb edən ərizəsi üzrə 8-1(81)-49/2018 saylı “izahdan imtina” haqqında qərardad 7 il (?) sonra 2025-ci ilin mayında “Elektron məhkəmə” sistemində yerləşdirilib. İlginc özbaşınalıqdır ki, qərardadın özü sistemdə yoxdur, yalnız tələbkarın qərarın icraya yönəldilməsini tələb edən ərizələri sistemdədir. Tələbkarın olmayan (?) qərardaddan 11.05.2025-ci il tarixli apellyasiya şikayəti isə PA-ya, MM-ə, hüquq mühafizə orqanlarına, Ali Məhkəməyə, MHŞ-ya, Ombudsmana,... 5 aylıq şikayətlərindən sonra 2025-ci ilin oktyabrın 15-də göndərilib. Bakı AM-in İK-sı (s/e Nigar Nəbizadə) 29.10.2025-ci il tarixli qərardadla apellyasiya şikayətini mümkün saymayıb ki, olmayan qərardaddan şikayətin sistemə gec qoyulması tələbkarın suçudur. Bəs qərardadın özünün olmaması kimin suçudur? Lap olsun, bəyəm gec də olsa, dövlətin adından çıxarılan məhkəmə qərarı icra olunmalı, icraya yönəldilməli deyil? Belə çıxır, Konstitusiya faktiki qüvvədə deyil. Qüvvədə olsaydı, 129-cu maddə tətbiq olunardı. Məhkəmə heyəti kassasiya şikayəti vermək üçün dövlət hesabına vəkillə təminatdan da imtina edib ki, elektron sistemdə 1-ci dərəcəli Qarabağ əlilinin hansısa sahibkardan 150 manat (?- minimum əmək haqqı 400 manatdır- M.B.), dövlətdən maaş, pensiya, Prezidentdən təqaüd alması barədə “gəlir bəyannaməsi” yerləşdirilib. (?- olmayan qərardad, olmayan “gəlir bəyannaməsi” sistemdə “tapılır”, amma tələbkarın ərizələri tapılmır?) Konstitusiyanın qüvvəsizliyinə baxın, qanun 1-ci dərəcəli Qarabağ əlillərinin ödənişsiz, dövlət hesabına hüquqi yardımla təminatını təsbit edir, məhkəmə isə qazinin pensiya-təqaüd alması “əsası” ilə hüququna qadağa qoyur. Vurğulamaq yerinə düşür, eyni heyət Kamran Əkbərovun sədrliyi ilə 1-ci dərəcəli Qarabağ qazisinin vermədiyi (??) apellyasiya şikayətini mümkün sayıb, baxıb, amma verdiyi şikayəti isə mümkün saymayıb. (?). Özü də həmin verilməyən apellyasiya şikayətini BİM-in (h. Ləman Musayeva) özbaşına ayırdığı “paykovoy” vəkil (Fərid Rzayev) qazinin imzası olmadan özü imzalayıb göndərib (?) (Ləman Musayeva VKRH-nın aparat rəhbəri Orxan Babayevi də, intizam komissiyasının üzvü Əlirza Həbilovun sifarişi ilə özbaşına DİN-in vəkili və nümayəndəsi kimi işə cəlb edib) Bakı AM-in İK-sı bu cinayətə qiymət vermək əvəzinə saxta qərardaddan saxta şikayəti qüvvədə saxlayıb. Bəs nəzarətedici qurumlar, özəlliklə, MHŞ nəyə nəzarət edir, prokurorluq nəyə baxır? İddiaçı Qarabağ qazisi ərizə vermədiyi halda, apellyasiya şikayəti vermədiyi halda onun adından imzasız apellyasiya şikayəti yazılır, amma ərizə verəndə kassasiya şikayətini yazmağa vəkildən imtina edilir? Eləcə də BİM-ə (Günel Sevdimalıyeva (rüşvət xidməti yüksək qiymətləndirilib, Bakı AM-ə transfer edilib), Aygün Əhədova, Aygün Abdullayeva) məhkəmə qərarlarının icrasının təmin edilməsi amacı ilə dövlət hesabına vəkillə təminatına verdiyi ərizələrin heç birinə cavab verilmir. Heç tələbkar kimi verdiyi ərizələrin də qəbulundan Konstitusiyaya qarşı çıxaraq imtina edilir. Belə Konstitusiya ilə təminat verilən hüquq harda görünüb? Absurddur, məhkəmə nə xidməti vəzifəsini icra edir, nə də tələbkarın ərizələrini qəbul edir. Söz Baş prokurorda, Məhkəmə Hüquq Şurasındadır: Dövlətin adından çıxarılan məhkəmə qərarlarının icrasına borclunu , məhkəməni məcbur etdirmək onların görəvidir.

Məğrur Bədəlsoy