SOCAR-ın investisiya departamentinin sabiq rəisi, həbsdə olan biznesmen Adnan Əhmədzadənin işi onun yaxın adamının media karyerasını bitirmək üzrədir.

Gundemxeber.com bildirir ki, bu haqda Cumhuriyyet.az-a verilən xəbərə görə, Əhmədzadənin media işlərini kurasiya etmiş Global Media Group rəhbəri Elnur Abdullayevin “qələmi qırılıb”. Xatırladaq ki, Elnur Abdullayev sabiq nazir Ziya Məmmədovun dönəmində Nəqliyyatın İntellektual İdarəetmə Sistemi və Dövlət Avtomobil Nəqliyyat Xidməti kimi gəlirli postlara rəhbərlik edib.

Onun birdən-birə “media patronuna” çevrilməsi də elə bundan sonra başlayıb. Azərbaycanda bir sıra saytları “satın” alan Elnur Abdullayev Türkiyədə “Haber Global” telekanalını qurub. fəaliyyəti ərzində sözügedən televiziyanın Türkiyə kanallarının reytinq göstəricilərində autsayderlər sırasında olduğunu görürük. Deməli, bu nəticəyə gəlirik ki, “Haber Global” daha çox vəsait əldə edib mənimsəmək üçün üfürülmüş şardan başqa nəsə deyil. Həmin televiziyanın ən böyük “uğuru” Azərbaycana aid olan xəbərlərin məhz sosial şəbəkələrin Azərbaycana aid seqmentində paylaşaması olur. Elnur Abdullayev telekanal adı ilə özünə maliyyə axınını həll edib.

Elnur Abdullayev həm yerli mətbuatda, həm də Türkiyə mətbuatında Fəttullah Gülən tərəfdarı “Nurçu” kimi qələmə verilib. Bununla bağlı cumhuriyyet.az olaraq xatırladaq ki, Türkiyə mətbuatında Elnur Abdullayev haqqında “Haber Global”ın sahibi FETÖ imamı mı?” başlıqlı xəbər yayımlanıb. Ortaya çıxan mənzərə ondan ibarətdir ki, Ziya Məmmədovun “vurulması”ndan sonra tutduğu vəzifədən uzaqlaşdırılan Elnur Abdullayev sabiq İMAM Elnur Aslanov kimi qınına çəkilib təyziqləri özündən uzaqlaşdırmır, əksinə, dirəniş göstərməkdə, bunu virtual mediada yeni saytlar və internet TV-lər yaradaraq nümayiş etdirib.

Gələn informasiyalarda deyilir ki, Adnan Əhmədzadənin həbsindən sonra Elnur Abdullayev media kuratorluğundan məhrum edilir. Eyni zamanda, Əhmədzadəyə bağlı Baku TV -nin, eləcə də digər media resurslarının rəhbərliyində dəyişikliklər gözlənilir. Hakimiyyət mediaya nəzarət prosesini təmərküzləşdirir və çoxqütblü nəzarət siyasətinə son qoyur. Çünki son illərdə bu yanaşmanın tətbiqi özünü doğrultmayıb. Nəticədə ayrı-ayrı qrupların himayəsi altında fəaliyyət göstərmək hakimiyyətə mediaya kontrolda çətinlik yaradıb. Ona görə də ən yaxşısı bir əldən idarəetmə mexanizmidir. Bu səbəbdən, Əhmədzadə – Abdullayev tandeminin himayəsi altında olan media qrup tamamilə əl dəyişir. Bu da Elnur Abdullayev dönəminin başa çatması deməkdir. Bunun ardınca onun Əhmədzadə ilə birlikdə fəaliyyəti, həmçinin mediaya ayrılan maliyyənin mənimsənilməsi şübhələri araşdırıla bilər.
Sonrakı dönəmə diqqət edək: Azərbaycanda nisbətən İP-si çox olan saytlara qarmaq atıldı. Onlarla aparılan danışıqların məzmunu beləydi ki, saytlar 51-49 faiz pay bölgüsü ilə satılır Elnur Abdullayevin özünün kurasiyasında olan şirkətə. Bu minvalla Azərbaycanda bir çox saytlar satın alınaraq Elnur Abdullayevin kurasiyasına keçib. Yəni faktiki olaraq həmin saytların sahibi 51 faizlik payla Elnur Abdullayevdir. İndisə Əhmədzadə işi bu səhmlərin Abdullayevdən alınması prosesinə start verməklə nəticələnib.

Gundemxeber.com