QHT-lərə Dövlət Dəstəyi Agentliyinin daha iri büdcə ilə eyni mövzuda filmlərin təkrar hazırlanmasına maliyyə ayırıb(?)

Məlumunuz olduğu kimi, Qeyri-Hökumət Təşkilatlarına Dövlət Dəstəyi Agentliyi Nazirlər Kabinetinin qərarı ilə təsdiq edilmiş böyük, orta və kiçik qrantlar verir.

Lakin, apardığımız araşdırmalar nəticəsində müəyyən etdik ki, Agentlik qeyri-rəsmi olaraq “Rəfiqə qrantları” üzrə bəzi QHT-lərə maliyyə ayırıb və ayırır. Ötən yazımızda onları biri -Binəqədi rayonunda yerləşən Bakı Tikiş Fabrikinin rəhbəri Səkinə Babayevaya verilən qrant barədə məlumat vermişdik.

İndi isə Yenixeber.org-a QHT-lərə Dövlət Dəstəyi Agentliyinin İcraçı direktoru Aygün Əliyevanın rəfiqəsi, Binəqədi Bələdiyyəsinin sədri postuna yiyələnməkdə yardımçı olduğu Sitarə Cabbarlının anasına verilən qrantlar barədə faktlar daxil olub.

Xatırladaq ki, Aygün Əliyeva Binəqədi Rayon İcra Hakimiyyəti başçısının müavini işlədiyi dövrdə 2 Bələdiyyə sədrliyi postuna rəfiqələri-Aytac Əliyevanın və Sitarə Cabbarlının sahiblənməsinə müstəsna yardım edib. Mediadan da məlumunuz olduğu kimi, Aytac Əliyeva küllü miqdarda korrupsiya və dələduzluğa görə hazırda həbsdədir. Sitarə Cabbarlı isə müavini Sabir Həsənovla birgə öz ərizələri ilə işdən azad olunublar.

Aygün Əliyeva QHT-lərə Dövlət Dəstəyi Agentliyinin icraçı direktoru təyin edildikdən sonra, əksər rəfiqələrinə və tanışlarına göstərdiyi qayğını Sitarə Cabbarlıdan da əsirgəməyib. Onun anasına, AzTV-nin əməkdaşı Firuzə (Nadir) Rəsulovaya məxsus QHT-yə 4 dəfə qrant ayırıb.

Onlara məxsus “Azərbaycan Milli Kulinariyasının Araşdırılması, Təbliği və Dünyaya İnteqrasiyası” İctimai Birliyinə aşağıdakı layihələr verilib:

2022-ci ildə: “Qarabağın dad yaddaşı” adlı filmin hazırlanması – 8 000 manat,

2023-cü ildə: “Qarabağın Çörək Muzeyi” adlı filmin hazırlanması – 9 000 manat,

2024-cü ildə: “Bal kimi süfrə” adlı filmin hazırlanması – 10 000 manat,

2025-ci ildə: “Torpağın dad hekayəsi” adlı filmin hazırlanması – 10 000 manat.

Diqqət etdinizsə, təşkilatın qrant aldığı layihələrin hər biri film hazırlanmasına həsr olunub. Bu filmlərin hər birinin mövzusu ilə bağlı digər televiziya kanallarında kifayət qədər sanballı sənədli filmlər hazırlanaraq, efirə verilib. Eləcə də, AzTV-nin efirində də bu həmin mövzularda filmlər təqdim olunub.

Maraqlıdır ki, QHT-lərə Dövlət Dəstəyi Agentliyinin daha iri büdcə ilə eyni mövzuda filmlərin təkrar hazırlanmasına maliyyə ayırıb(?) Bəlkə də Agentlik televiziyaların hazırladığı filmlərin keyfiyyətini bəyənməyib.

Qeyd edək ki, bu filmlərin mövzusu və aktuallığı bizim araşdırma hədəfimiz deyil. Biz QHT-lərə Dövlət Dəstəyi Agentliyinin heç bir araşdırma və təhlil aparmadan, dövlət büdcəsindən yenidən xərcləməklə təkrar filmlərə qrant ayırmasına və bu qrantların tanışlıq münasibətləri əsasında verilməsinə diqqəti yönəldirik.

Araşdırmalarımız zamanı bir neçə QHT sədri və mühasibi ilə fikir mübadiləsi apararaq, yuxarıda qeyd olunan filmlərin real xərclərini öyrənməyə çalışdıq. Onlar filmləri bir-bir nəzərdən keçirərək, ikisinin 3 min manata, digər ikisinin isə 2 min manata ərsəyə gətirməyin mümkünlüyünü vurğuladılar. Bildirdilər ki, təşkilat rəhbərinin AzTV-nin resurslarından istifadə etdiyini nəzərə alarıqsa, filmlər daha az məbləğə başa gələ bilər. Fotolardan göründüyü kimi, filmlərin təqdimatı isə hər dəfə eyni məkanda, cəmi 15-20 nəfərin iştirakı ilə keçirilmişdir.

QHT sektorundan Yenixeber.org-a ötürülən məlumatda, Agentliyin təsadüfi QHT-lərə böyük məbləğdə film layihələri verməməsi də yer alır… Əksəriyyəti kiminsə dostu, köhnə iş yoldaşı və ya rəfiqəsidir. Tezliklə hər biri ilə bağlı maraqlı faktlar təqdim edəcəyik.

Lakin, bizi narahat edən dövlət büdcəsinin bu cür səmərəsiz istifadə edilməsinə nəzarət olunmamasıdır. Biz bir media resursu olaraq, bu qədər faktları araşdırıb tapa biliriksə, aidiyyəti qurumların və şəxslərin dövlət büdcəsinə bu cür münasibət göstərilməsinə göz yumması ciddi şübhələrə yol açır.

Görünən odur ki, QHT-lərə Dövlət Dəstəyi Agentliyinin rəhbərliyi dövlət büdcəsi hesabına öz rəfiqə və tanışlarının maliyyə ehtiyaclarını qarşılamağa, onların ailə üzvlərinin toy xərclərinin qarşılanması və ya avtomobillərinin yenilənməsi üçün qrantlar ayırmağa davam edir.

Yaxın günlərdə “Rəfiqə qrantları” ilə yanaşı, dövlət strukturlarında çalışan şəxslərə məxsus QHT-lərə paylanan qrantlar barədə araşdırmalarımızı təqdim edəcəyik./yenixeber.org