Türkiyə-Ermənistan-Azərbaycan münasibətlərinin normallaşması və bunda ABŞ Prezidenti Donald Trampın oynadığı rol regionda sabitliyi istəməyən qüvvələri hərəkətə keçirib.

Gundemxeber.com Globalinfo.az-a istinadən xəbər verir ki, Obri Belford və Adam Klassfeld adlı amerikalı müəlliflər “Trampın Türkiyə sevgisinin səbəbi” məzmunlu məqalə dərc ediblər.
Məqalədə iddia edilib ki, Türkiyə Prezidenti Rəcəb Tayyib Ərdoğan Tramp administrasiyasına qeyri-adi dərəcədə güclü təsirə malikdir:
“Bunun arxasında oliqarxlar və milyonlarla dollarlıq sövdələşmələr dayanır. 2017-ci il yanvarın 19-da Trampın inauqurasiyasından bir gün əvvəl Vaşinqtondakı “Votergeyt” otelində gizli görüş keçirilib. Görüşdə dörd əsas şəxs iştirak edib:

— Türkiyənin xarici işlər naziri Mövlud Çavuşoğlu;

— Lobbiçi və Trampın inauqurasiya komitəsinin sədr müavini Brayan Ballard;

— Ukraynada doğulmuş və Trampa dəstək təşəbbüslərinin əsas donorlarından olan, görüşü təşkil edən Lev Parnas;

— Türk-azərbaycanlı dəniz daşımaları maqnatı Mübariz Mənsimov.

Parnasın sözlərinə görə, Mənsimov Türkiyə prezidentinin ailəsinə 25 milyon dollar dəyərində neft tankeri hədiyyə edib və şəxsi təyyarəsindən Ərdoğanın istifadə etməsinə imkan yaradıb”.

Müəlliflər yazır ki, görüşdə “Türkiyənin və onun lideri Ərdoğanın xeyrinə ABŞ-da lobbiçilik üçün milyonlarla dollarlıq iki müqavilə” müzakirə olunub:

“Ərdoğan–Tramp xəttinin əsas vasitəçiləri keçmiş sovet respublikaları ilə bağlı iş adamları və oliqarxlardır.

Ballardın lobbiçilik müqavilələri Parnasın, Mənsimovun və ABŞ Xəzinə Departamenti tərəfindən Putinlə yaxınlığı səbəbindən “rus oliqarxı” kimi tanınan Fərhad Əhmədovun dəstəyi ilə əldə olunub.

Trampın inauqurasiyasından iki gün sonra azərbaycanlı oliqarx Fərhad Əhmədov dünyanın ən böyük yaxtalarından olan 117 metrlik “Luna” ilə Mayamiyə gəlib. Əhmədov həm Türkiyə–Rusiya münasibətlərində, həm də ABŞ–Türkiyə arasında vasitəçilik edib”.

Müəlliflər eyhamla bildirir ki, məhz azərbaycanlı milyarderlərin vasitəçiliyi nəticəsində Türkiyə və Prezident Ərdoğanın Trampa təsiri xeyli artıb:

“Bundan sonra Tramp Ərdoğanı “ən yaxın beynəlxalq dostlarından biri” adlandırıb.

Trampın Suriyanın şimalına Türkiyənin hərbi müdaxiləsinə Ərdoğanın bir telefon zəngindən dərhal sonra razılıq verməsi də bu münasibətlərin nəticələrindən biridir”.

Amerikalı müəlliflərin sözügedən məqaləsini şərh edən erməni yazıçı Harut Sassunyan qeyd edib ki, ermənilərin bənzər lobbiçilik gücündən istifadə edə bilməməsi təəssüf doğurur:

“Paşinyan vaxtını Katolikos və Ermənistan Apostol Kilsəsi ilə çəkişmələrə sərf edir. Bunun əvəzinə, Ərdoğanın Türkiyə üçün etdiklərinin, heç olmasa, kiçik bir hissəsini Ermənistan üçün edə bilərmi?”

Gundemxeber.com