2022-ci ildə Qətərdə keçirilən dünya çempionatı zamanı qalmaqallı açıqlamaları ilə gündəmə gələn qanalı şaman Nana Kvakı Bonsam yenidən diqqət mərkəzindədir.

Gundemxeber.com-un xarici KİV-ə istinadən verdiyi məlumata görə, vaxtilə İngiltərə millisinin hücumçusu Harri Keyni "lənətlədiyini" iddia edən Bonsam bu dəfə 2026-cı il FİFA Dünya Çempionatının qalibi ilə

bağlı maraqlı proqnoz səsləndirib.
Şamanın iddiasına görə, builki mundialın kubokunu Kriştianu Ronaldonun liderlik etdiyi Portuqaliya millisi qazanacaq.

"Bu dünya çempionatı Kriştianu Ronaldonun və Portuqaliyanın olacaq", – deyə Nana Kvakı Bonsam bildirib. O, bununla kifayətlənməyərək, son dünya çempionu Argentinanın növbəti mərhələdə Kabo-Verdeyə məğlub olacağını da iddia edib.

Qanalı şaman Harri Keynlə bağlı əvvəlki qalmaqallı açıqlamalarına da aydınlıq gətirib. O bildirib ki, artıq ingilis futbolçuya qarşı heç bir mənfi münasibəti yoxdur.

"Harri Keyn mənim düşmənim deyil. Hətta yaxın zamanda dünyaya gələcək övladlarımdan birinə onun adını verəcəyəm", – deyə Bonsam vurğulayıb.

Şamandan Harri Keynin rəqiblərinə qarşı yenidən hansısa "lənət" tətbiq edib-etməyəcəyi soruşulduqda isə o, bu suala yalnız gülümsəməklə cavab verib.

Bonsam daha əvvəl Qana-İngiltərə oyunu öncəsi keçirdiyi ritualın matçın nəticəsinə təsir göstərəcəyini iddia etmişdi. İndi isə həmin fikirlərindən geri çəkildiyini və Keynə münasibətinin dəyişdiyini deyir.
Onun ən diqqətçəkən açıqlamalarından biri isə Türkiyə millisi ilə bağlı olub. Şaman iddia edib ki, Türkiyənin dünya çempionatlarındakı uğursuzluqları onun ritual zamanı baş vermiş təsadüfi səhvin nəticəsidir.

"Qananın rəqibini zəiflətmək üçün xüsusi ayin hazırlamışdım. Lakin ritual zamanı xəritəni tutan şagirdim sürüşdü və enerji səhv istiqamətə yönələrək Türkiyəyə təsir göstərdi", – deyə o bildirib.

Qeyd edək ki, Nana Kvakı Bonsamın açıqlamaları şəxsi iddialardır və onların elmi və ya idman baxımından təsdiqlənmiş əsası yoxdur.

Qanalı şamanın Portuqaliya ilə bağlı proqnozu gerçəkləşə bilərmi? Kriştianu Ronaldo karyerasını dünya çempionu kimi başa vura biləcəkmi? Argentinanın Kabo-Verdeyə uduzacağı iddiası realdırmı?

Tanınmış idman yazarı Natiq Muxtarlı Musavat.com-da bunu sadəcə şarlatanlıq adlandırdı: "Dünya çempionatı o qədər böyük, qlobal turnirdir ki, bunun ətrafında hər cür spekulyasiyalar baş verə bilər. Yadımdadır, hələ 80-ci illərdə, texnologiyanın inkişaf etmədiyi vaxtlarda hansısa ölkədə bir fil tapmışdılar, mundialla bağlı proqnoz verirdi. İndi texnologiya inkişaf edib, superkompüterlər proqnoz verir. Amma ənənəvi şarlatanlar-cadügərlər yenə də iş başındadır. Amma nə superkompüterlərin, nə də cadugərlərin proqnozlarını ciddiyə almağa dəyməz.

Azərbaycanlı Zirəddin Rzayevin proqnozları nə qədər ciddidirsə, bu qanalı şamanın da dedikləri o qədər ciddidir. Futbol milyonların sevimli oyunudur, amma onun bir fəlsəfəsi də var: Proqnozları sevmir".

N.Muxtarlı da proqnoz verməyi unutmadı: "Ronaldonun Portuqaliyası dünya çempionu ola bilər. Çünki bu komandanın heyətində həqiqətən də yüksək səviyyəli futbolçular var. Amma hazırkı oyun keyfiyyətini nəzərə alsaq, Portuqaliya 1/16 finalda elə Xorvatiyaya məğlub olub mübarizəni dayandıra da bilər. Portuqaliya qrup mərhələsində yalnız Özbəkistana qalib gələ bildi. Yəni usta futbolçular oyun keyfiyyətini tapmayanda nəticə də olmur. Bu amili nəzərə alsaq, Portuqaliyanın dünya çempionu olmaq şansı yoxdur. Amma elə Xorvatiya ilə oyunda partlayış baş verə, Portuqaliya ən yüksək səviyyəli performans nümayiş etdirə bilər. Hə, onda bundan sonra onların qarşısını almaq çətin olacaq. Məntiq odur ki, futbol meydanda oynanılır və hər şeyi də həll edən futbolçuların oyun keyfiyyətidir. Qalan bütün proqnozlar ya şarlatanlıqdır, ya da DÇ-yə əlavə rəng qatmaq üçün yaradılan şoudur.

Mən qanalı cadugər kimi yox, qrup mərhələsindəki oyunları izləyəndən sonra peşəkar qənaətimə əsaslanaraq proqnoz verirəm: Dünya Çempionatının qalibi Fransa olacaq. Amma bütün hallarda bu da adi proqnozdur. Fransa da hansısa mərhələdə və ya elə final oyununda zəif çıxış edə bilər. Hər şey meydandakı futbolçulardan asılıdır. Bütün proqnozları onların həmin andakı oyun keyfiyyəti doğruldur".

Gundemxeber.com