Paris İnzibati Apellyasiya Məhkəməsi “Milli Birlik” (Rassemblement National RN) partiyasının lideri Jordan Bardellanın 2024-cü il Avropa Parlamenti seçkiləri kampaniyası çərçivəsində bəyan etdiyi 235 min avro məbləğində xərclərin dövlət tərəfindən ödənilməyəcəyini təsdiqləyib. Məhkəmə həmin xərclərin ictimai maliyyələşdirmə çərçivəsinə daxil edilə bilməyəcəyini hesab edib.

Gundemxeber.org xəbər verir ki, Bardella kampaniya üzrə ümumilikdə 4 milyon 120 min 379 avro xərc bəyan etmişdi. Kampaniya Hesabatları və Siyasi Maliyyələşdirmə üzrə Milli Komissiya (CNCCFP) isə bəzi xərcləri, o cümlədən nəqliyyat, təhlükəsizlik, iaşə və nümayəndəlik xərclərini qəbul etməmişdi.

Qəbul edilməyən xərclər arasında Bardellanın media çıxışları zamanı yaxın mühafizəsinə sərf olunan 66 min avrodan çox vəsait, gündəlik səfərləri üçün təxminən 4 min avro şəxsi sürücü xərci və 13 min avroya yaxın restoran xərcləri yer alır.

Məhkəmə həmçinin 2024-cü ilin aprelində Jirond departamentində keçirilən Blaye Şərab Festivalı zamanı alınmış 50 dequstasiya dəstinə görə ödənilən 400 avronu da kampaniya xərci kimi qəbul etməyib. İyulun 17-də çıxarılan qərarda bu xərcin seçicilərin səsini qazanmaq məqsədi daşımadığı və buna görə seçki xərci sayıla bilməyəcəyi bildirilib.

Bundan başqa, 2024-cü ilin mayında Madriddə keçirilən mitinq zamanı İspaniyanın Vox partiyasının lideri Santiaqo Abaskala hədiyyə edilən 88 avro dəyərində şampan şüşəsinin, eləcə də Kənd Təsərrüfatı Sərgisinə giriş üçün xərclənən təxminən 800 avronun ödənilməsi rədd edilib.

Bununla belə, məhkəmə 128 min 579 avro məbləğində xərci yenidən kampaniya hesablarına daxil edib və dövlət tərəfindən ödəniləcək ümumi məbləği 4,04 milyon avro müəyyənləşdirib.

Jordan Bardella 2024-cü il iyunun 9-da keçirilən Avropa Parlamenti seçkilərində 31,37 faiz səslə birinci olub. Dövlət tərəfindən qəbul edilməyən xərclər namizədlərə verilən sabit dövlət kompensasiyası hesabına qarşılanmayacaq.

Gundemxeber.org