Fransanın Yon departamentinin Şevan kommunasında “Əyilməz Fransa” hərəkatının 68 yaşlı fəalına hücumun edilməsi ilə bağlı Oser Prokurorluğu araşdırmaya başlayıb.

Gundemxeber.org xəbər verir ki, hərəkatın Yon üzrə yerli bölməsi hadisəni ifrat sağçıların törətdiyi daha bir dözülməz zorakılıq aktı kimi qiymətləndirib. Bildirilib ki, velosipedlə hərəkət edən fəala 3 nəfər hücum edib. Onlar həmin şəxsin velosipeddən yıxılmasına səbəb olub, daha sonra onu döyərək boğmağa çalışıblar.

 “Əyilməz Fransa” hərəkatının yerli bölməsinin açıqlamasına görə, hücum edən şəxslər Bardellaya səs verdikləri ilə öyünüblər.

 “ICI Auxerre” radiosunun məlumatına görə, zərərçəkənin bədənində zərbə yerləri aşkarlanıb. Həkimlər ona səkkizgünlük əmək qabiliyyətinin itirilməsi barədə arayış veriblər.

Hərəkatın yerli bölməsi bunun Yon departamentində baş verən ilk belə hadisə olmadığını bildirib. Açıqlamada daha əvvəl feminist fəallara qarşı hücumların və bələdiyyə seçkilərinə namizədlərə ünvanlanan ölüm təhdidlərinin qeydə alındığı vurğulanıb.

Oser Prokurorluğunun araşdırması hücumun bütün hallarını və hadisədə iştirak edən şəxslərin məsuliyyətini müəyyənləşdirməyə yönəlib.

Gundemxeber.org