İsveçrə Federal Şurası Rusiyaya qarşı Avropa İttifaqının 20-ci sanksiya paketindən əlavə tədbirləri təsdiqləmək qərarına gəlib.

Gundemxeber.org xəbər verir ki, bu barədə İsveçrə hökuməti açıqlama yayıb.

Hökumətin açıqlamasına görə, məhdudiyyətlər avqustun 20-dən qüvvəyə minəcək.

Sənədə əsasən, Bern Rusiyada yerləşən qaz daşıyıcılarına, buzqıran gəmilərə və LNG terminallarına xidmət göstərməyə qadağalar tətbiq edəcək, eləcə də tankerlərin Rusiyaya satışına qadağa qoyacaq. Bundan əlavə, üçüncü ölkələrə tankerlərin satışı üzrə müqavilələrə artıq onların Rusiyada təkrar satışını qadağan edən bənd daxil edilməlidir.

Maliyyə sektorunda kriptovalyutaların mübadiləsi və köçürülməsi üçün Rusiya platformalarından istifadəyə, eləcə də müəyyən rəqəmsal aktivlərin inkişafına dəstək verilməsinə də qadağa qoyulub.

Mayın 22-də Bern Aİ-nin Rusiya əleyhinə sanksiyalarının 20-ci paketinin birinci hissəsini tətbiq edərək, Rusiyanın hərbi-sənaye kompleksi və enerji sektoru ilə əlaqəli 115 fiziki və 60 hüquqi şəxsi sanksiya siyahısına əlavə etmişdi.

Gundemxeber.org