Hərbi-ekspert: “Qitələrarası ballistik raketlərin istifadəsi Rusiyanın özü üçün də yaxşı nəticələrə gətirib çıxarmaya bilər”.

“Bu sadəcə Rusiyanın əzələ nümayişidir. Digərlərini Rusiyaya qarşı fəaliyyətdən çəkindirmək məqsədi ilə səslənən bir bəyanatdır”.

Bu sözləri hərbi-ekspert Ədalət Verdiyev Rusiya prezidentinin NATO-nu təhdid etməsinin nəticələrini şərh edərkən qeyd edib.

Dünən Rusiya prezidenti öz çıxışında NATO-nu bir daha təhdid etdi və bildirdi ki, onlarda NATO-ya cavab vermək üçün elə vasitələr var ki, bu vasitələrin qarşısı Şimali Atlantika Alyansı tərəfindən alına bilməz.

Rusiya prezidenti hansı vasitələrdən və silahlardan bəhs edirdi? Söhbət nüvə silahının istifadəsindən gedirsə, NATO-nun bu silaha qarşılıq verə bilməməsini necə izah etmək olar? Ümumiyyətlə nüvə müharibəsi fəlakəti baş verərsə, Rusiyanın və NATO-nun özünü qorumaq imkanları hansı səviyyədədir və hansı tərəf nüvə müharibəsindən daha çox zərər görmüş olar?

Gundemxeber.Az bildirir ki, Rusiya-NATO qarşıdurmasını PİA.az-ın əməkdaşı hərbi-ekspert Ədalət Verdiyev ilə müzakirə edib.

Ədalət Verdiyev: “Bu raketlərin tətbiqi əks zərbələrin istifadəsi ilə müşahidə oluna bilər. Bu da Rusiya üçün yaxşı nəticələr vəd etmir”.

Ukraynada taktiki nüvə silahlarının istifadəsi məqbul qəbul olunsa da, strateji nüvə silahlarının istifadəsini mümkün hesab etməyən ekspert PİA.az-a bildirib ki, bu Qərb, NATO tərəfindən cavab zərbəsi ilə müşahidə olunar. Bu isə hər iki tərəf üçün dünyanın sonu deməkdir:

“Rusiya NATO-nu təhdid edərkən qitələrarası ballistik raketləri və hipersəs “Kinjal”, yəni “Xəncər” raketlərini nəzərdə tutur. Biz artıq “Xəncər” raketlərinin istifadə ilə tanışıq. Amma qitələrarası ballistik raketlərin istifadəsi Rusiyanın özü üçün də yaxşı nəticələrə gətirib çıxarmaya bilər. Başqa sözlə desək bu raketlərin tətbiqi əks zərbələrin istifadəsi ilə müşahidə oluna bilər. Bu da Rusiya üçün yaxşı nəticələr vəd etmir.

Odur ki, bu sadəcə Rusiyanın əzələ nümayişidir. Digərlərini Rusiyaya qarşı fəaliyyətdən çəkindirmək məqsədi ilə səslənən bir bəyanatdır.

Ukraynada taktiki nüvə silahlarının istifadəsi məqbul qəbul olunsa da, strateji nüvə silahlarının istifadəsini mümkün hesab etmirəm. Çünki bu da Qərb, NATO tərəfindən cavab zərbəsi ilə müşahidə olunar. Bu isə hər iki tərəf üçün dünyanın sonu deməkdir”.

Gundemxeber.Az