Kreml ABŞ prezidenti Donald Trampın Ukraynada sülh nizamlanması uğursuz olarsa, Rusiya neftinə ikinci dərəcəli rüsumlar tətbiq etməklə hədələməsinə münasibət bildirib.

Bu, Rusiya prezidentinin mətbuat katibi Dmitri Peskovun jurnalistlərlə brifinqi zamanı baş verib.   

“Amerika tərəfi ilə təmaslarımızı davam etdiririk. Mövzu çox mürəkkəbdir, Ukraynanın tənzimlənməsi ilə bağlı müzakirə etdiyimiz substansiya çox çətindir. Onlar çoxlu əlavə səylər tələb edir”, - deyə Peskov vurğulayıb.

Qeyd edək ki, aprelin 1-də ABŞ prezidenti Rusiya rəhbərliyinin Ukraynadakı münaqişənin sülh yolu ilə həllinə razı olmadığı təqdirdə yeni rüsumlar tətbiq etməyə hazır olduğunu bir daha təsdiqləyib. Eyni zamanda, Donald Tramp bunu etmək istəmədiyini vurğulayıb və Rusiya prezidentinin müqavilələr bağlamağa razı olacağına ümid etdiyini bildirib.

Martın 30-da Donald Tramp münaqişənin həlli Rusiyanın günahı üzündən baş tutmasa, Rusiya neftinə ikinci dərəcəli rüsumlar tətbiq edəcəyi ilə hədələyib. ABŞ prezidenti rusiyalı həmkarından narazı qaldığını gizlətməyib.

GundemXeber.Az