ABŞ Prezidenti Donald Trampın Administrasiyası xarici yardımı daha 5 milyard dollar azaltmaq niyyətindədir.

Gundemxeber.az xəbər verir ki, bu barədə "New York Post" (NY Post) məlumat yayıb.

Məlumata görə, ölkə büdcəsinə qaytarılacaq 5 milyard dolların 3.2 milyard dolları ABŞ Beynəlxalq İnkişaf Agentliyinə (USAID), qalan vəsait isə Dövlət Departamentinin digər fondlarına yönəldilib.

Qeyd olunub ki, yardıma Hondurasda iqlim dəyişikliyi ilə mübarizə üçün 24.6 milyon dollar, keçmiş Yuqoslaviya ölkələrində LGBT ideologiyasını təbliğ etmək üçün 3.9 milyon dollar və resurslarında irq zəminində nifrət doğuran məqalələr dərc etdirən Cənubi Afrika Demokratiya Fondunun işinə 2.7 milyon dollar daxildir.

Bundan əlavə, Ağ Ev BMT-nin Konqo Demokratik Respublikası və Mərkəzi Afrika Respublikasında sülhməramlı missiyalarına dəstək üçün ayrılmış 838 milyon dolları ABŞ büdcəsinə qaytaracaq.

Xatırladaq ki, fevralın 3-də Tramp administrasiyası ABŞ-nin xarici siyasətini həyata keçirmək üçün istifadə edilən və digər ölkələrə təsir aləti olan USAID-in fəaliyyətini faktiki olaraq dayandırıb. Martın 10-da USAID-in müvəqqəti rəhbəri vəzifəsinə təyin edilmiş ABŞ dövlət katibi Marko Rubio bəyan edib ki, hökumət yoxlamadan sonra agentliyin proqramlarının 83%-ni dayandırıb.

Gundemxeber.az