Tanınmış hüquqşünas Aslan İsmayılov Ramiz Mehdiyev "işi" ilə bağlı maraqlı status paylaşıb. Həmin yazını Gundemxeber.com-un çoxsaylı oxucularına təqdim edirik:

"Ramiz Mehdiyev haqqında cinayət işi qaldırılandan onun obyektiv aparılacağına şübhəm yox idi, çünki bu işin Dövlətimiz üçün əhəmiyyətini bilirdim. İlk günlər də işlər qaydasında gedirmiş kimi göründü. Uzun müddət keçməyinə baxmayaraq cinayət işinin qaldırılması barədə rəsmi məlumatın olmamağından narazılığımı elə bu səhifəmdən elan etdim.

Günlər keçdi, 50 nəfərlik siyahı da elan olundu. R.Mehdiyevdən başqa haqlarında cinayət işləri qaldırılan digər şəxslər olmadı. Hərçənd ki, R.Mehdiyevin nəvəsinin toyunda iştirak edib onun liderliyi haqqında badə qaldıranları hamı gördü.  Ondan başqa bu ölkədə R.Mehdiyevlə bir komandada Əli Həsənovun, onun qudası Səttar Mehbalıyevin, Ziya və Elton Məmmədov qardaşlarının, Abel Məhərrəmovun, Nəcməddin Sadıxovun və digərilərinin olmasını bu ölkədə bilməyən yoxdur.

R.Mehdiyevin kürəkəni İlham Əliyevin qayınatasının əsgəri olması və iş adamlarının yüz milyonlarla ölçülən əmlaklarını əllərindən almasına baxmayaraq onun da haqqında bir səs çıxmadı. Əvəzində R.Mehdiyev vəzifədə olanda onun tapşırıqlarını can-başla icra edənlər, bu gün isə hakimiyyətin rəsmiləri vəzifəsini yerinə yetirənlər bəh-bəhlə bir tikə çörək uğrunda dava döyən müxalifətçi jurnalist Təzəxan Mirələmovu R.Mehdiyev dəstəsinin üzvü elan etdilər… 

Rusiyanın keçmiş Baş Naziri məşhur Viktor Stepanoviç Çernomırdinin dediyi kimi, istədilər yaxşı edələr, həmişəki kimi alındı. Bax beləcə, R.Mehdiyev işini bir müxalifətçi jurnalist səviyyəsinə endirdilər. Bundan sonra bu işin ədalətli araşdırılmasına insanları necə inandıracaqlar, bilmirəm."

Gundemxeber.com